SOGO論壇

標題: 土地公 [列印本頁]

作者: 絕對官僚 時間: 2011-3-25 01:55:34 標題: 土地公

土地公

對細漢，山腳的土地公
就用微微的笑，
來保護阮這幾庄的人。
每一次，拜土地公，
攏不免大魚、大肉。
簡單兩三樣水果和餅，
一支香，伊就真歡喜。
有時陣，啥麼牲禮攏無，
合掌虔誠去拜，
伊也是對阮微微的笑。
像阮呷苦呷慣習的庄腳人，
無啥麼野心，
祈求的只是平安。
庄內老人不時咧講：
子孫有福有德，這片土地
就有希望。
後來，少年家一個一個出去，
有的去呷頭路，
有的去做工、經商。
中、老一輩的人，
猶原透早起來，去巡田水，
搓草、捉蟲、沃肥。
每一次，經過土地廟，
大家猶原去求平安，
求都市的子孫無災無難，
有福有德。
土地公坐在內底，微微的笑，
親像對阮講：安啦！安啦！
雖然做田真艱苦，
阮也感覺真幸福。
土地公生，大拜拜，
去都市打拼的子孫，大大小小
攏轉來了。
尹無忘記土地公，無忘記
這座出產稻仔、樹薯、芎蕉的
照鏡山，大家攏真歡喜。
大魚、大肉辦皈桌，
卻無半個人求福德，
求平安。
尹關心的只是六合彩的明牌，
房地產、股票的起落。
無人注意漸漸老去的田庄，
漸漸黯淡的月娘。
一大陣人散去了。
阮坐在田畔，遠遠看去，
看未到，土地公微微的笑，
只有香爐內，一蓬一蓬香火，
在暈暗的廟內，
明明，滅滅。

文出：古雅台語人

歡迎光臨 SOGO論壇 (https://oursogo.com/)