SOGO論壇

標題: 紅藤(台語散文) [列印本頁]

作者: 絕對官僚 時間: 2011-10-3 20:03:33 標題: 紅藤(台語散文)

早起醒來，看出二樓的後窗。紅紫蘇的光彩對（ui3）青楓仔的枝葉射過來，紫紅色彩食著早起日光的美糧，射出一款飽足的氣色，親像咧催我趕緊起床。

長衫長褲穿好勢，加一領夾克，無洗面，嘛無洗喙。開前門，踅（seh8）到後埕，專心來觀賞紅彩的真面目。一大片紫紅色掛滿碎葉樹的樹椏（ue），閣（koh）有的是吊佇半（puann3）空中，看起來是碎葉樹予人乞食趕廟公，地盤佮光彩攏去予紫紅色葉仔搶去。是何方的神葉佇半空中出現咧？我行落斜坡地，欲（beh）來查分明。行到一半，佇（ti7）草木中，一隻鹿仔跳起來。顯然是受著我跤步聲驚醒過來。一向，佇冬天時仔，鹿仔會來阮後埕過暝。原來，秋天in嘛會來歇睏。Ooh，閣一隻跳起來。兩隻做伴，一跳二跳，跳入去後埕的樹林內。

行到碎葉樹邊，看著一條野藤對（ui3）樹頭旋出來，順樹身爬上樹尾去，藤大約有半寸粗。「藤寄生仔」眞趣味，共（ka7）人樹枝伸展的空間佔去一大半，閣對樹尾垂吊佇空中。年久月深，有一日垂落來地面、生根。這款本尊佮（kah）分身一體的本事，宛然是台灣榕（tshing5）仔樹的氣根同款。

來源:台灣閩南語朗讀文章選輯

歡迎光臨 SOGO論壇 (https://oursogo.com/)