SOGO論壇

標題: 初三、四，月眉意；十五、六，月當圓；廿三、四，月暗暝。 [列印本頁]

作者: 水漾甜心 時間: 2011-1-4 19:54:04 標題: 初三、四，月眉意；十五、六，月當圓；廿三、四，月暗暝。

初三、四，月眉意；十五、六，月當圓；廿三、四，月暗暝。

教過國小自然科ê 老師，攏有chit 種經驗，beh 教hō͘ 學生了解天頂星球運行ê 規則，是一項誠無簡單ê 工課，kan-taⁿ 教一下月光月暗ê 變化著好，tī 時看會著月眉仔，tī 時會出半月，tī 時ê 月上圓，台仔頂老師講kah 喉ta 嘴khoah ，學生囡仔猶原大部分「莫宰羊」。
講--à 莫怪，日頭、月娘、地球ê 天體運行，本成著是一種三度空間ê 關聯，beh 講講bē chhun-chhia ，beh kí 閣kí bē 好勢，規氣用畫--ê ，愈畫愈花，愈畫愈看無，連老師都講kah 霧sà-sà ，ah 囡仔beh 哪聽有？
Chit-mái ê 教學卡進步，重觀察、重實驗，所以老師攏會指導學生做長期觀察月娘ê 變化，月初ê 月出現tī-toeh ，啥物形--ê ，月中央--leh ，ah 月上圓ê 時陣是tī 叨一工？攏愛詳細紀錄，有影比卡早卡科學。m̄-kú 好是好，做khit 來才知無簡單，你都知，台灣ê 天頂時常都烏chap-chap ，日-- 時beh 看會著日頭著無逐工有，向望逐暗beh 天青，免想--ò͘ ，講，聽無，beh 觀察看無月娘，考試beh 按怎？月考總是愛考--a ，參考書sa 出來讀，測驗卷分落去「煉」，暗唸、暗記，bē 曉背kah 會曉，管thāi-I 有了解無了解，滿分卡要緊，考試100 分，老師gâu 教，囡仔gâu 讀，父母有面子，著是校長、主任kap hit-lō 出版社ê 頭家，嘛歡喜參咧。
Li-li lo-lo 講chiah 濟beh 創啥？其實是beh kā 恁紹介一句咱祖公留落來ê 智慧：「初三、四，月眉意；十五、六，月當圓；廿三、四，月暗暝。」請你kā 念一遍，閣念一遍，包你一生記tiâu-tiâu ，永遠bē ka-la̍uh ，好聽好記閣押韻，真正一兼二顧，bong 蜊仔兼洗褲。
尾仔，閣插一個花仔，你嘛會使得插一句「初七、八，月半圓」tàu 參咧，按呢教囡仔念-- 十分鐘，卡嬴讀參考書二點鐘，敢有影？試看咧你著知。

φ註解φ
tī 時：啥麼時陣。
喉ta 嘴khoah ：喉乾嘴渴。
莫宰羊：m̄ 知影。
bē chhun-chhia ：[ 不能透徹瞭解]
kí ：指，用手比。
tī-toeh ：[在哪兒]
烏chap-chap ：[ 烏煙瘴氣]
sa ：拿。
背：pōe 。
管thāi-I ：[ 管他的]
廿三：jia̍p-saⁿ 。
記tiâu-tiâu ：[ 記得牢牢的]
ka-la̍uh ：[ 丟失，忘了]
bong 蜊仔：摸lah-á 。

歡迎光臨 SOGO論壇 (https://oursogo.com/)