SOGO論壇

標題: 人生親像大舞臺，苦齣笑詼攏公開。 [列印本頁]

作者: 草薰風 時間: 2011-2-3 18:29:53 標題: 人生親像大舞臺，苦齣笑詼攏公開。

人生親像大舞臺，苦齣笑詼攏公開。

即句俗語，將人生比喻做一個「大舞臺」，在人生的過程中，有悲傷流目屎亦有歡喜笑詼(khoe1)的劇情，終其尾攏會佇人生的舞臺頂公開表演出來。

有人講，人生在世親像一齣戲，每一個人攏咧專心演伊家己的角色，有的人扮演小生、有的人扮演苦旦，有的人扮演是小丑仔、舉旗軍仔，唔管是啥乜角色，攏是劇情內底袂使(sai2)欠缺的。人生的滋味往往是鹹、酸、苦、汫(chiaN2)，有光明嘛有暗淡的時陣，有得意嘛有失意的時刻，有舖橋造路的功德，嘛有僥倖失德的行為，唔管是啥款?最後攏愛現身佇世人的眼前，接受別人呵咾佮批評。前美國總統林肯，捌(bat4)講過「汝會當一時瞞騙所有的人，嘛會當永遠瞞騙一部份的人，但是汝無法度永遠欺騙所有的人。」有的獨裁者無了解「苦齣笑詼攏公開」的道理，以為會當「一手遮天」濫滲烏白做，攏無人會知影，嘛無人有法度伊。但是歷史是無情的，夠時一件一件的罪行攏記錄在人間的大舞臺上。

參即句俗語有相關的：

棚頂做甲流汗，棚跤嫌甲流瀾。
拍鼓的，勒(lek8)死歕鼓吹的；歕鼓吹的，勒死扛轎的。
千里路，三四步；百萬雄兵，七八人。
　

〔註〕

苦齣：齣chhut4，讀台語音「出」指劇本。可憐、悲傷的情節故事。
笑詼：詼khoe1/khe1，讀台音語「葵」「溪」。幽默，詼諧、有趣之意。

歡迎光臨 SOGO論壇 (https://oursogo.com/)