SOGO論壇

標題: 一日煩惱日落申，一暝煩惱雞報寅。 [列印本頁]

作者: 草薰風 時間: 2011-2-4 19:13:35 標題: 一日煩惱日落申，一暝煩惱雞報寅。

一日煩惱日落申，一暝煩惱雞報寅。

即句俗語主要是咧(leh4)講，有的人厚操煩，心肝放袂(be7)清，啥乜(mih4)代誌攏按歹(bai2)的去想，規暝規日煩惱東煩惱西、袂食袂睏，互人看著嘛替伊艱苦。

過去咱的祖先，將一日分做十二時辰(子、丑、寅、卯、辰、巳；午、未，申、酉、戌、亥)，每一個時辰有兩點鐘久，依現在時間的講法，暗時11點到隔日透早1點叫做子時，1點夠3點叫做丑時，所以「申時」著是下晡3～5點，「寅時」著是透早3～5點。換一句話來講，「日落申」、「雞報寅」著是表示透早夠透暗，規暝規日的意思。做序大人對家己的子女，常常放袂落心，一日煩惱夠暗。另外戀愛中的男女，嘛定定無頭神，按透早想愛人想甲透暗。

有二首台灣國風是安爾描寫的：「一日煩惱日落申，一暝想甲雞報寅，一日無見咱娘面，恰慘細囝(kiaN2)斷了奶。」、「一日煩惱日落申，一暝煩惱雞報寅，咱嗖心肝無要緊，無采咱哥的心神。」二首攏用著「日落申」、「雞報寅」的俗語，汝看是唔是誠趣味咧！

參即句俗語相關的：

一日煩惱無夠，一暝煩惱來鬥。
一人煩惱一樣，無人煩惱相親像。
煩惱十三代囝孫，無米通食。
家己睏桌跤，煩惱別人厝漏。
　

〔註〕

日落申：申sin1，讀台語音「新」。指太陽在五點下山。
雞報寅：寅in5，讀台語音「芸」。指在早上五點時雞啼。

歡迎光臨 SOGO論壇 (https://oursogo.com/)