今哺日係舊曆15，當多伯公下有還福，有當多人打早就去拜伯公，這下伯公就像現下鄰里長共樣，逐伯公有自家管區，祭拜有固定信眾，下把仔會有外位來，旦係較少。汝有看過像圖片中這細伯公廟無？見擺我愛去上課就會經過，係講時間還罅(夠)，下把仔會去拜，去摎伯公打嘴牯，這間伯公廟細吂細，有百零年歷史，恬恬佇該守護佢子民，佢田庄，分佢子民五谷豐登，子賢孫孝，各各就有好成就。
逐擺經過毋識堵著有人適該拜伯公，今哺日適該經過，看著有人佇該拜伯公，雖然拜人無當多，牲儀少少，旦係伯公從來就毋會嫌少，照常歡喜領受。我看著遽遽過去歙幾張相片，續手打下嘴牯，探一下這座伯公歷史摎過往，相片分大家看，旦係愛保護這座伯公，請毋好問我適奈位，畢竟這下有心人當多，尤其係古物，大家欣賞就做得。