路邊的相命仙

絕對官僚

路邊的相命仙（台語詩）

一塊紅桌巾
  服侍一尊烏面神
一爐靜香煙
  點渡一段世俗緣
一管舊籤筒
  當等一個迷路人

問道行
天靈靈  地靈靈
伊的擔頭就排甲足分明
長長闊闊路一程
無爭甲足頭前
嘛無退甲足後爿
有觀星望斗的好本領
嘛有觀前顧後的警覺性
知影管區的慈悲抑酷刑
今仔日好心情抑歹心情
毋才袂承著罰單賺無閒


問吉凶
天茫茫  地茫茫
人生何處太平無風浪
一條皺紋
隱藏一痕滄桑
伊無佇厝內弄孫作公
出擔咧曝日吹風
是欲算吉抑欲算凶
你毋知命愛走縱
伊知命嘛愛走縱
攏為三頓咧走縱
是欲安怎分吉凶
敢有啥物無正常


問前途
天烏烏  地烏烏
有時陰沉有時雨
落土有定數
改運有撇步
有緣有渡
無緣不渡
一支竹籤報你一條光明路
予你出門攏袂沃甲澹糊糊


天烏烏  地烏烏
啥物時陣會下雨
啥物時陣袂下雨

若欲開破嘛愛擱講半晡

雖然隨緣嘛愛擱二百箍

                     ——摘自＜浪人詩集＞