阿媽佮戇孫

絕對官僚

阿媽教戇孫

戇孫仔

阿媽疼你

阿媽惜你

愛你平安勇健食百二          食百二：吃到一百二十歲。


阿媽教你

有牲禮用牲禮

無牲禮用誠意

恬恬拜拜就好

毋通用手指月娘

會予月娘半暝甲你偷割耳        予（ho）：給、被。



囝仔人

毋知天有外高                            毋（m）知：不知道。

毋知地有外厚                            外（goa）高：多高。

啥物代誌                                     啥物（sian  mih）代誌：什麼事情。

有耳無嘴

恬恬聽過就好

毋通甲人湊政治                         湊（chhap）：參與介入。

會予歹人半暝甲你掠掠去          掠（liah）掠去：抓走。



阿媽厚話是疼你惜你                   厚話：嘮叨。

愛你平安勇健食百二



戇孫應阿媽

阿媽啊

我毋甘的老大人

敢是細漢的時

無人疼妳

無人惜妳

予人嚇甲無膽去

才會予妳這呢驚代誌



阿媽啊

對月娘拜拜

有牲禮無牲禮攏誠意

用手甲指嘛袂有代誌

毋免驚伊半暝偷割耳

只是毋通用飛彈甲射射去         毋通：不可以。



對政治恬恬

艱苦吞落腹內是善意

無湊顛倒予人食死死

毋但無權無勢袂賺錢

顛倒會予歹人半暝掠掠去



阿媽啊

我毋甘的老大人                毋甘：不忍心。

咱欲安份

人無分寸

咱欲古意

世間已經無古意



問我天有外高

古早古早

有可能足高

今佇北京爾爾                爾爾（nia  nia）：而已。

已經是無外高



問我地有外厚

古早古早

有可能足厚

今一層一層

予人直直犁薄去              直直：一直。

予人直直收割去

擱賸嘛已經無外厚            擱賸（chhun）：還剩的。



阿媽啊               

我嘛疼妳

我嘛惜妳

愛妳平安勇健食百二

只是天公伯仔予咱的

眾神無鬥保庇

土地予咱的

一暝一暝

直直無去

我嘛毋知欲安怎

欲安怎才會當

予妳平安勇健食百二


陳建成 2009 / 3 / 6