深秋落雨日

絕對官僚

昨暝一陣大雨  到今日猶原點點滴滴落未煞
秋冬兮中部哪會落這款雨水呢

素常熟識兮都市面容是黃金彩妝兮
彼是予一年通天攏赤焰焰兮日頭所疼惜兮
阮無什慣習安爾兮天氣 縱亦不是頭一擺拄到

未慣習兮世間代  敢會當親像今日兮雨水恬恬落爾
恬恬落土兮雨水 敢有影遐邇恬靜予人心頭清閒呢

上課講到曾文正公日記所檢討兮思維  誠是有見識 - -

古今億萬年，無有窮期。人生其間，數十寒暑，僅須臾耳。大地數萬里，不可紀極。人於其中，寢處游息，晝僅一室耳，夜僅一榻耳。

人生短如朝露 渺小如滄海一粟
安爾短暫兮一生、渺小兮生命  按怎不知好適過活呢
按怎著愛汝爭我鬥  予大家歹過日子呢
是不是大家著愛學習曾文正公日記思考兮 - -

知地之大，而吾所居者小，則遇榮利爭奪之境，
當退讓以守其雌。

若是有權有勢兮大人物 益加要逮念這款兮心思 - -

念人生苦不知足，方望溪謂：「漢文帝之終身，常若自覺不勝天子之任者。」最為善形容古人心曲。大抵人常懷愧對之意，便是載福之器、入德之門。

舉頭探看窗外  雨水有一滴無一滴猶續續落
阮兮心肝頭猶原未得清閒
世間代  不是阮一人會使拍算兮
就是要等到這當辰  我才會當完全明白王荊公按怎會寫出〈鳳凰山〉這首無啥親像伊兮氣魄兮詩句 - -願為五陵輕薄兒   鬥雞走狗過一生
是按怎兮世間代予一個曾講出「不畏浮雲遮望眼」的鬥士頹喪如此呢...

深秋落雨日  英雄寂寞 是阮未當忘情兮滋味

作者: 蘭臺讀書人