一工快樂，一工痛苦

絕對官僚

【台語詩】一工快樂，一工痛苦／陳潔民

你的面容我已經未記得

可能有幾條仔皺痕

抑是規頭鬃的銀白

我干單對你手提一支薰吹

浮出白色煙霧彼兩片夢幻的喙唇

有小可仔記持



你愛講人生的哲學

就是一工快樂，一工痛苦

人類將自我虐待

當作是上大的享受



你第一擺講的時陣

我當做你滾耍笑

有一站仔，我的人生只有痛苦

無啥物快樂

你所講的一工快樂佮一工痛苦

我完全無法度體會



你閣講人生的空虛

親像久無見面的朋友

佇街仔路雄雄拄著

見面就將你攬稠稠

無卜放手

予你茫茫渺渺



你第二擺講的時陣

我開始懷疑

你有一個悲傷的靈魂

慣習將家己的快樂

關佇內籬仔底

連放封都無機會

噢，一直到我有淡薄仔歲頭

總算知影你講的意思

一工快樂，一工痛苦

人生充滿無常、苦、空的本質

毋管較早偌爾光彩

總有一工愛規盤繳繳出來

可惜我了解的時陣

你已經去另外一個世界

來源：海翁台語文學