【台語詩】第三肢跤

絕對官僚

第三肢跤／陳潔民



島嶼的寒天無雪

正月風，冷酸酸

像針葳葳鑽

鑽入心肝添憂悶

卦山的日頭當黃昏



慈悲的天公伯仔

揀佇冬尾

賜予阮敬愛的妳

第三肢跤



毋免求神託佛，妳的頭頂

除了天公伯

閣有陳靖姑、媽祖婆

救世師父、玄天上帝

求怹保庇，從來毋免跋杯



眾神明的神威，相爭顯現

虔誠的信女，哪會倒落去？

咁是跋斷跤骨顛倒勇

命運考驗千萬重？



自七歲開始，厝內的重擔

就硩佇妳瘦閣薄板的肩胛頂

家庭散赤、無錢讀冊

妳是兼母職的大姐

為著生活顧三頓

割牛草、擔王梨、做散工

目屎家己拭

艱苦無人問




十八歲決定上台北

日夜拼力學司仔工

做衫的手藝

出師拄好一個月

返來開店做頭家

改善厝內的經濟

晟養小弟小妹

閣卡艱苦的工課

嘛無囥佇眼底



誰知影二十六歲

熟識頂世人的冤家

嫁到一個緣投的尫婿

相爭人卜愛

有尫，煞比無尫較害

人生的鳥籠仔

就按呢箍妳四五十冬

無法度輕鬆



孤單一人，四個囝仔

妳共款堅強

數十春秋的奉獻

少年的青春浮浪

酸苦的面容

寫滿超過一甲子的

滄桑



阿母，阮知影

妳的跤骨

若行一步，一步疼

阮交代的話

向望妳來聽：



「妳著偎靠第三肢跤

佇阮出外時

代替阮的手

扶持妳重新學行

佇巷仔內沓沓仔散步

陪伴妳的孤單」



「阿母，妳若耐心練行

白鐵仔彼肢跤

總有一工

會當放下

阮會一直牽妳的手

陪妳鬥陣行

做妳永遠的

第三肢跤」

－－獻予阮上敬愛的阿母，寫佇半線

來源：海翁台語文學113期