九頓米糕無上算，一頓冷糜抾去囥。

草薰風

九頓米糕無上算，一頓冷糜抾去囥。


即句俗語照字面的意思是，不時款待人佇大餐廳食好料理，嘛提供上好的服務，對伊好，結局無將汝一片的誠心好意，囥(kng3)佇心肝內。萬一若(na2)有一工恰無週到，去食著一擺路邊擔的冷糜，煞因為對即件代誌的不滿，甲汝記一世人，這實在是誠(chiaN5)無公平的對待。

即句俗語用「對照」的手法來表現，互人有深刻的印象。「九頓」佮(kah4)「一頓」比喻「濟」參「少」的對照。「米糕」佮「冷糜」表示「好」參「歹」的對比。「無上算」佮「抾去囥」強調「無」參「有」的對照，就文學的技巧來講，嘛是誠懸(koaN5)手法。咱通常會怨嘆歹(phaiN2)做人，普通時對人好了慣習，時間一下久，煞變「禮數當然」，有一工若做了一件恰無順適的代誌，伊都甲汝記椆椆(tiau5)，過去的好事攏放水流，這是足唔值的代誌，亦是做人為難的所在。即款的現象通常發生佇「大家(ta1-ke1)」、「新婦」的身上；「頭家」、「辛勞」的身上；「官員」、「百姓」的身上，莫怪有人講政治人物，若像咧表演行鋼索特技的人，九十九擺攏成功過關，只要有一擺跋落去，都攏去了了。人的感情佮主觀，往往會互一人個失去理性佮客觀，這是人佮人袂(be7)和諧，社會袂安定的主要原因囉！

參即句俗語有相關的：

一遍賊。百世賊。
做天，嘛袂中人意。
隔壁親家，禮數原在。
不孝新婦三頓燒，有孝查囝路上搖。
仙人拍鼓有時錯，跤步踏差啥人無。
爻(gau5)公親，唔值乖主人。


　〔註〕

無上算：「上」chiuN7，讀台語音「章」第七調。意指不含括在內，不算數或沒記在心理。
冷糜：糜moe5，讀台語音「媒」。指冷掉了的稀飯。
抾去囥：抾khioh4，讀台語音「卻」。指把東西撿起來放置某處。



--------------------------------------------------------------------------------