鴨母王朱一貴

不曬月亮的魚

這鴨母王朱一貴是佇嘉義西爿沿海，差不多彼布袋彼，彼的住民啦。
啊彼當時呼，是得養鴨為生，啊沿海佇得養鴨為生。
這將來「鴨母王」的原因，就是這朱一貴本身是得養鴨為生啦。

啊彼久仔得飼養的當時仔，伊安呢呼彼的鴨母啦，啊伊就共喝符令，就叫伊排直的，啊就排直的，啊叫伊排橫的，伊就排橫的。
呼～啊一寡附近的親友、朋友呼，啊逐个攏講：「呼～啊你這干若皇帝嘴咧！」
啊煞彼鴨母叫伊來就來，叫伊去就去，啊叫伊號做彼時陣排直的，就直的，排橫的，就橫的安呢呼，有這款這个操令的就著啦。
啊一寡這的親友囉，就煞直直共封、直直共封，封講：「這皇帝嘴哦！這後日會做皇帝。」呼安呢有一寡口號就著啦。

啊本身啦，有一日呼，佇水邊啦，啊照一个影，啊伊的影煞呼，啊煞安呢看著戴著彼皇帝帽啦，通天關呼，啊穿著彼號九龍袍，皇帝衫安呢！
啊號做煞想著講：「呼啊自己無定有彼皇帝命！」啊就安呢想啦。
啊當～有一日的時，就漸漸安呢呼啊兄弟就招兵買馬囉，就逐个就安呢呼，就安呢略略仔安呢呼，啊四面有呼應來安呢啦。
啊講起來是：彼當時是反清復明啦，卜來反清啦。呼啊起一寡民兵啦，就卜來攻啦。
彼陣仔就卜來攻嘉義啦，嘉義彼久仔號做「諸羅」、「諸羅山」，啊先來攻嘉義安呢。
彼當時啊，簡單攻一下就破，嘉義城就佔來囉。啊嘉義城就佔來啊，彼當時嘉義城內就擱招兵買馬囉，啊愈大陣安呢。
啊愈大陣呼，啊煞人成濟啦。啊兵馬直直偎來，啊聲勢成大啦。啊嘉義囉就順續攻去府城台南去囉，就攻去府城去。
啊攻去府城去，無啥幾工，啊府城擱攻破，啊攻破當時啊，佔這个南台灣啦，逐个就攏佔來囉。
啊就佔來囉，彼當時，這的兄弟，逐个就傷過緊快囉，啥物去戲班囉，去提彼戲服，提彼的戲服就來論功功封賞啦。
啊就卜來進殿，卜做皇帝安呢啦，啊來封官，就提彼戲服來穿。

啊彼當時，逐个得封官啦，啊幾品官，幾品官提來封。啊彼當時，有一个軍師呼，啊就有少許仔有通一寡仔地理啦、天機啦。
聽講彼唐山彼方面咧，有一个軍師啦，有得算啦，講：「皇帝得著一个眠夢啦。」啊號做予軍師來解，
啊軍師講；「臺灣出蕃王啦！啊安呢呼擱三工後呼，聖上上殿，號做免朝三工安呢。
啊三工若過去，啊就煞去。」

啊就是這三工內呼，臺灣彼軍師講、講有得共伊祭族，煞臺灣安呢呼煞三支糧草，祭祭咧，講向彼日出的所在共伊射。
呼～彼當時，若正常是五更早朝，皇帝上殿啦；啊這三支糧草講對彼向東向日方面共伊射去，
講去到皇帝殿，煞變成三支箭，自安呢對彼塊坐的、彼塊、彼塊金鑾寶座安呢射去，
啊皇帝抵仔免朝無坐佇彼，無若無正港的，抵仔對皇帝心臟落去。

所以，彼當陣仔彼朱一貴啊，號做啊才有名來啦。
就是由遮這「臺灣的蕃王」啊，本來就是飼鴨母底的呼，所以這个「鴨母王」的原因，就是對遮來的。

哦～啊後來三日免朝，路尾仔彼軍師算算講：「啊既然是安呢爾爾，安呢就要緊，咱派大隊來去。」呼，啊大陸彼陣仔才派大隊人來，寡不敵眾啦，咱彼佔據南台灣爾，呼啊彼北台灣到遮來，伊朱一貴家己的內部論功封賞，啊講啥物無公平囉，逐个安呢部隊兵眾呼，啊逐个計較啦，啊逐个無出援兵相救啦。啊到咱遮新竹、苗栗遮，攏是的軍隊啦。所以朱一貴啦，這短短的〔曇花〕一現啦，這亦是號做講咱臺灣得造反，得反清的轟轟烈烈的故事之一啦呼，啊就是這「鴨母王朱一貴」的故事。       


資料出處：參見《台中縣民間文學集13－－沙鹿鎮閩南語故事集(二)》

wen310

感謝大大無私分享，謝謝感恩！