- 註冊時間
- 2007-5-12
- 最後登錄
- 2025-1-9
- 主題
- 查看
- 積分
- 149261
- 閱讀權限
- 250
- 文章
- 365008
- 相冊
- 1
- 日誌
- 8
 
狀態︰
離線 
|
天氣款款涼冷兮，早起時較想欲食糜，無愛復食パン配牛奶。不過，食糜就無當像食パン配牛奶遐邇利便呢，干但煮，若無將半點鐘，是煮未爛兮。
食糜無配菜，嘛吞未落去，定著愛配醬菜才合味。值這個時代欲去叨位買醬菜呢？去超級市場買罐頭醬菜嘛是會使得，不過，若食若不是滋味，化學味予阮懷念起阮做囝仔兮時代....就安爾，半工兼專工，阮就趁歇困日走一行故鄉，辦一寡細漢時辰不時食兮醬菜轉來食。
轉來到二、三十公里外兮故鄉，不管伊按怎現代化，阮目珠蔭著，用摸兮嘛摸會到菜市口。原在置這兒，原在三角窗位，原在一盆復一盆五色十味兮醬菜....猶復原在是....幾十年前兮醬菜伯仔，伊做一世人兮醬菜，原在是賣著伊做兮醬菜，攏無變、攏無變、幾十年來攏無變！
看著眼前攏無變兮情景，阮兮心肝頭是酸甘甜兮酸甘甜...會記得這味麵筋是爸爸上愛食兮，會記得這兒兮紅豆沙是阮愛食佚陶兮....會記得細漢時辰，大人攏是派阮做囝仔兮來這買食，欲食早頓進前才來買就會赴啊！又復生，又復好食，全全攏是現工做兮，匟過頂工就歹去啊，阿誰像現此時兮罐頭醬菜，會使匟過二三年猶會食得，食啥貨？無生兮物件和加一味化學味啦！
欲走進前，醬菜伯仔兮ラジオ猶放送著阮爸爸在生兮時辰嘛愛聽兮日本演歌，伊兮喙內猶旋旋念著伊兮後生食公家頭路兮代誌與阮聽，伊就是猶會記得阮是和伊後生同緣兮。啊！老大人兮記性有影真好，彼是量約三四十年前兮過去啊，遐邇濟年兮，伊哪會記得遐邇清楚呢？
醬菜伯仔兮醬菜上生、上好食，數十年無變，欲似伊對這故鄉兮代誌同款，予伊講起來攏無變、攏無變！干但是伊變老兮，阮爸爸和伊平歲數，卻是無復通食伊手做兮麵筋啊！阮已經嘛無少年兮，猶復親像細漢時安爾來買醬菜，只好是買與家己食，無通復像囝仔時代買轉來與序大人食啊！
這頓早頓，食得真正有滋味，有古早味，亦有一款講未出喙兮酸甘甜兮酸甘甜...滋味。
作者: 蘭臺讀書人 |
|
發表於 2011-4-20 02:46:44
