- 註冊時間
- 2015-1-10
- 最後登錄
- 2024-12-27
- 主題
- 查看
- 積分
- 28410
- 閱讀權限
- 250
- 文章
- 20609
- 相冊
- 8
- 日誌
- 27
 
狀態︰
離線 
|
各位鄉親朋友，我這个時陣，卜來講一个古早，一个勸世的故事，就是「豬屎公仔挾豬屎」。
這个故事就是佇我十幾歲的時陣，阮彼阿媽來講予阮聽的。這个故事就是有真好，
對囝仔的這个一種、另外一種方法的教育方式，佇彼來講予囝仔聽，真有意義。
講這个豬屎公仔，伊得拾豬屎，因為彼陣的田園、彼陣的種作，
無論是種菜、種稻仔、種蕃薯，攏都靠這个粗肥、粗糞，牛屎啦、豬屎啦，這方面的物件，
來佇彼來壅，物件才會水。所以這个豬屎公仔每一日，伊就上山去拾豬屎。
因為彼个時陣的豬，若毋是食蕃薯、豬菜，就是趕去這个山頂，予伊食這的草啦，食這的野生物件。
所以講，伊放屎攏會放佇這个山頂。豬屎公仔利用閒閒的時間就去彼，來拾這个豬屎，
轉來壅菜啦呼，壅這的稻作、果子，這的物件。
有一日，伊拾到這个蛇仔郎君的厝，因為蛇仔郎尹佇彼个所在，是真富裕的一个大好額人，
所以講伊有花園真闊，種真濟花草。豬屎公仔看著這个花園，開了真濟這个水的花，
伊就共伊偷挽二三蕊，轉來送予伊的查某子。因為伊的查某子有三个，
所以講挽花轉來送予查某子，是一種真優雅、一種真雅氣的做法。
但是伊的查某子，毋捌看著呰爾水的花，二三个就真歡喜，來接受老父所送這个花。
尤其是這个第三查某子，就是生做真幼秀，伊就將這个花、真水的花，
將這个模樣來繡佇這个荷包啦、枕頭布，抑是這个被單的頂面，繡著真水。
有一日，這个豬屎公仔看見這个查某子成愛花，伊擱拾豬屎的到佇這个蛇郎君的厝的，
伊看著花園擱有另外一種花開了真水，伊就擱共挽二三蕊。啊－，真歹運，抵好挽起來，
猶未離開的時，抵仔蛇郎君佇外頭轉來，去予蛇仔郎君看著，因為這个蛇仔郎君做人真好，
伊就問豬屎公仔，講：「豬屎公仔，啊你怎樣會共我偷挽花？」豬屎公仔彼个時陣真驚惶、真歹勢、真著驚，
伊講：「啊就安呢啦，我有三个查某子呼，啊就真歡喜這个花呼，真合意這个花呼，
所以我共你偷挽三蕊卜來轉來送的啦，安呢。」這蛇仔郎君聽見講：「好啦！」啊伊是半講笑，
一面是共這个豬屎公仔半講笑，伊講：「抑無彼花送你無要緊，我共你處罰，
啊你一个查某子來嫁予我，好無？」這个豬屎公仔，伊是一个老大人，蛇仔郎君伊是用這个呼，
講笑的方式得共伊講呼，啊伊掠做真的，伊就轉去，就共彼三个查某子講：
「啊今仔日擱共蛇郎君偷挽花呼，去予掠著。啊是講呼，伊講無卜共我罰，講您其中愛一个來嫁伊。」
啊查某子聽聽咧，心內攏成無歡喜。啊就彼中晝，豬屎公仔彼个時陣就真煩惱，佇彼得睏，
實在毋是得睡，成實講，煩惱講這件事毋知卜安怎排解？但是第一个查某子就來叫伊食飯，
伊偎來，講：「阿爹、阿爹！起來食飯。燒燒好米飯，鹹鹹鴨母卵，阿爹敢做就敢擔當。」
伊越落就擱走，豬屎公仔真煩惱：「大的一定毋答應。」小等下換第二的來，
第二的佇彼來共伊叫：「阿爹、阿爹！起來食飯。燒燒好米飯，鹹鹹鴨母卵，阿爹敢做就敢擔當。」
哇－，豬屎公仔這个時陣又擱煩惱起來：「第二的又擱毋答應。」擱再一下仔，換彼个第三查某子來，
伊講：「阿爹、阿爹！起來食飯。燒燒白米飯，鹹鹹鴨母卵，爹做子擔當。」哇－，彼个時陣，
真正豬屎公仔就較輕鬆一點啊，因為第三个查某子答應卜嫁予這个蛇仔郎君，所以講伊就放心啊，
伊就佇彼心內想：「大漢查某子赫爾無情，第二个猶原仝款，只有這个第三查某子呰爾有孝。
伊無想講伊呰爾水，伊甘願卜嫁予彼个蛇郎君。聽講蛇郎君伊是一个大蛇變精，佇彼个所在，
就是講大蛇精，會食人的一个真驚人的、這个人講是妖怪。」實在這第三查某子攏是為著老父的事，
佇彼來答應這件事，歡喜卜來嫁予蛇仔郎君。
無偌久，豬屎公仔才去共蛇郎君講：「我有一个查某子卜嫁予你，伊有答應，你毋知歡喜無？」
蛇郎君就共豬屎公仔講，講：「豬屎公仔，彼我是得共你講笑的，啊你煞掠做真的呢，呼！」
豬屎公仔講：「有影呢！我的查某子講卜嫁你呢！」蛇郎君真歡喜。有一日伊就派一个媒人，
這个媒人就是這个螉蚴，人講螉蚴就是古早的媒人。螉蚴咱卜看著呼，佇這个厝的內面飛來飛去，
伊頭大身軀大，到彼个下腰的時，到賸一細支仔，到尾仔擱大起來，長長。啊伊攏會咬土來鑲佇彼个壁彼。
這个螉蚴，亦有人講「魔魔神。伊來將外口這个蟲，來共咬轉來囥佇伊的巢內底，
伊就佇彼安呢來共伊用涎予伊食，到尾這隻蟲就會變一隻螉蚴，就是會變螉蚴子出來，
所以講這个螉蚴真厲害。蛇郎君就派這个螉蚴，講：「你去共我做媒人，你干仔提一寡這个檳榔，
去予這个豬屎公仔，先共伊拍一个招呼，予伊有心理準備，咱卜共伊捾定，安呢。」
這螉蚴就提檳榔囥佇豬屎公仔厝去，共豬屎公仔講：「hng1啊hng1，阮官人叫我捾檳榔，卜收你就收，
毋收我回倒轉。」豬屎公仔彼个時才講：「這是阮查某子的代誌，啊無呼，先得先、後得後，
你按大漢的先去共問，看伊卜嫁無。」彼隻蚣蚴呼，這个媒人就先去彼个大漢的彼。
彼个大漢查某子抵仔佇彼得煮飯，伊佇彼煮飯的時，這隻螉蚴講：「hng1啊hng1，
阮官人叫我捾檳榔，卜收你就收，毋收我收倒轉。」這个佇彼煮飯的講：「你就較緊走，
若無我停仔用我這个鱟就共你敲予你死。」啊就無法度啊，伊就毋答應啊。
將仔換彼个第二的，伊就講：「hng1啊hng1，阮官人叫我捾檳榔，卜收你就收，毋收我卜回倒轉。」
彼个第二的舉一支飯篱，得挎飯彼飯篱，伊講：「無你若毋較緊走，我卜用這个飯篱共你敲予你死。」
啊就走。走啊就哇，兩个攏毋答應。這就走，走去到彼个房間內，這第三的這个較水、較幼秀，佇彼得繡花。
這媒人，這隻螉蚴就講：「hng1啊hng1，阮官人叫我捾檳榔，卜收你就收，毋收我回倒轉。」
這第三个、這个真水的這个查某囝仔，伊舉頭一下看，講：「好啦！多謝你哦！你共我囥得桌頂彼就好呼，
因為我tsin2得繡花無閒，多謝你。你轉去共您官人講，叫伊選一个日子過來過定，我願意嫁予伊做某子。」
哇－，這隻螉蚴就轉去回消息，這个蛇郎君就問螉蚴講：「啊彼个答應彼个，是生做安怎？」
伊講：「hoo2－，彼个成水哦，世間無當擱看赫水的，親像仙女下凡。」蛇郎君真歡喜，
伊講：「啊彼个第二的咧？」「ha3－，彼个第二的一面全仔子，親像彼个飯篱面。」
啊講：「彼个大漢的咧？」「彼大漢的哦，擱較，擴頭擴頭親像彼鱟面咧。」這種是一種的形容，
毋是講有差赫濟，呼，這是一種的形容，因為彼二个，對序大人較無有孝，對序大人較無順從。
所以講共伊形容到較一屑仔。
這第三个講真水，哇－，蛇郎君真歡喜，就派人講去捾定。
彼个時陣就扛這的冬瓜、糖霜、糕仔餅呼、金器啦呼，哇－，攏總款五六呼，
啊就十二个人扛，合這个螉蚴做媒人，就去。啊去的時，去到豬屎公仔的厝，佇彼來共過定。
抵仔暗啊，伊講：「啊暗啊，啊無就下昏住遮過暝。」哦，就過暝。
毋過豬屎公仔無夠額的眠床通予住，但是彼的人講：「毋免啦！您呼，你去彼後壁彼竹坪彼呼，
共阮剉十二枝的竹仔；媒人毋免啦，伊彼个壁角頭仔彼伊就會當睏。你共剉十二枝的竹仔，
共偎佇彼个門腳口，抑是彼个樹仔欉的所在，阮就會用e0睏啊。」哇－，呔講一个人一枝竹仔就會用e0睏？
這到底是啥物原因？豬屎公仔就真好奇，亦真嫌疑，睏到半暝，偷偷仔起來共伊看，共看的時，
哇－，心內真著驚，每一枝竹篙，攏總是一隻蛇，蜷佇彼个所在。無法度，hoo2－，就走入去。
安呢大漢查某子出來，出來看，hoo2－，攏總蛇；第二查某子出來看，亦是攏總蛇，
一枝竹篙一隻蛇蜷佇彼得睡；第三查某子偷走出來看，
伊出來看講：「e2－，每一人都佇彼一枝竹仔頂面，佇彼睏到真好勢，哇－，逐个攏生做真緣投、真飄撇。」
啊就去睏啊，逐个攏去睏。到天光，彼的人就準備轉去，啊轉去，這个豬屎公仔就共媒人講，
講：「選一个日仔，通來娶親，當時攏無要緊。」媒人轉去，就共這个蛇仔郎君講，
講：「人豬屎公仔第三查某子呼，予咱過定，叫咱選一个仔好日子通共伊娶過門。」
這个蛇仔郎君就真歡喜，伊就真正選一个好日子，將這个查某囝仔、這个豬屎公仔的第三查某子共娶過門，
佇彼過了真幸福的日子。佇彼，這豬屎公仔的第三查某子，佇彼食的是山珍海味，
佇彼穿的是綾羅紡絲，通講用的、食的、穿的攏是富裕的。連這个放屎所卜拭的物件攏用銀的，
叫做「銀屎篦」。啊若散鄉人都是用彼个竹仔、竹篾仔，來得拭尻川，啊伊用這銀的屎篦來拭尻川。
有一日，這个豬屎公仔就招伊彼二个查某子、大漢查某子，講：「來，來共看您小妹仔，看到底佇彼好抑。」
安呢。彼兩个、大漢查某子合第二的查某子，共豬屎公仔講：「免去看！彼是一个蛇精呢！
可能阮彼个小妹去予彼隻蛇共吞食落腹，可能含身屍都無啊。」豬屎公仔就用真沈重、真煩惱的心情，
講：「你若毋去，抑無我來去。」豬屎公仔就去，去到蛇仔郎君的厝的時，
哇－，查某子來開大門來迎接伊，蛇仔郎君亦佇彼歡歡喜喜接待伊，真歡喜來接待伊，呼。
入去大廳坐，哇－，想到，這个蛇郎君的厝內攏是用銀用金去鋪的。有一時，這个豬屎公仔食飽啊，
就講卜去大便、去放屎。卜去屎礐仔放屎的時，放好看來看去攏無看著彼拭尻川的物件，
伊就叫查某仔講：「某物人啊，啊您這屎礐仔呔無篾爿仔通好拭尻川？」
彼查某子共講：「阿爹，毋免啦，彼壁邊吊的彼呼，彼銀的做的，一支一支的彼，
就是『銀屎篦』啦，你用彼拭就好啦，拭了你就共摼彼邊仔彼畚箕仔彼，通捧去討擱。」啊－，
豬屎公仔彼个時陣真歡喜，亦真感慨，亦真無彩。這个銀的物件，做來拭尻川，拭了就共拚討擱，
啊，伊就真拾拾，將彼的銀屎篦，真濟，hoo2－，就去用這个土啦，用土沙粉去共鑢啦，
伊驚講彼臭臭呼，真無好，啊就去用彼土去鑢，用水共沖，洗到清氣清氣，每一支白sut4 sut4白葱葱呼，
就講卜齎轉去予彼二个大漢查某子，合第二查某子。彼个第三查某子講：
「阿爹，毋好啦，彼得拭屎毋好啦！我送一个金花，每一个人，兩个人我一个人攏送一蕊金花，
啊一支金頭鬃鍤仔，這个金花呼，予插，每一个攏有。」二个人攏有送真濟物件，安呢。
哇－，豬屎公仔真歡喜，轉去就共彼二个查某子講：「hoo2，頂擺仔您就毋嫁呼，
人伊佇彼偌富裕，hoo2－，偌富裕、偌好。」大漢查某子講：「抑無我才來共看覓咧。」
大漢查某子去，小妹猶原呼，合這个蛇郎君猶原真好款待，來款待伊。
卜轉去擱送伊真濟這个綢緞、這个衫褲，予伊通來穿。哇－，轉去就佇彼來品捧，
共彼个第二小妹仔講：「哇－，咱彼个三妹仔呼，哇，送足濟物件予我。」
第二个彼个講：「安呢我麼卜來去。」彼个第二的就去。去的時，哇－，真正，
看著呰爾好，伊就想盡辦法，卜將這个三妹共除掉，伊卜來佇遮接管，三妹遮的翁婿、財產，伊的一切。
所以講，每一日就穿第三小妹仔的衫褲，就抹伊的胭脂水粉，
啊就招這个小妹仔講：「咱來探井。因為這个井的水足恬靜呼，啊咱來看，看你較水抑我較水，
用這个水影來照呼。」以前無鏡，攏麼用水影得照家己的面。安怎都是小妹仔較水，
但是人講二个姊妹仔呼，講會差偌濟，實在講差偌濟啦。啊就粧，擱有一日，哇－，粧粧咧，
去探井，探起來講：「e2－，有像啊哦，二个人攏差不多、差不多。」彼个時陣，伊就想盡辦法，
將小妹仔共伊捒予落去彼个古井內底，捒予落古井內底就死啊。哇－，彼下昏，蛇仔郎君轉來，
伊就去開門，去共迎接，入去的時，蛇郎君講：「e5－，啊您二姊呔無看著？」
啊伊就假仙講：「啊阮二姊就轉去啊！」蛇郎君講：「hoo3－，安呢哦！」因為佇彼真濟工，
啊伊攏佇彼化粧啦，佇彼抹小妹仔的粉啦，穿小妹仔的衫仔褲，實在通講，
有時陣亦認會出講是第三抑是第二的。蛇仔郎君就得卜洗身軀，
叫伊講：「某物人，你去共我攜衫仔褲，我卜洗身軀。」哇－，悽慘啊，
啊今也伊煞毋知影講蛇仔郎君的衫仔褲攏都囥佇佗位，伊講：「啊你的衫仔褲囥佇佗位啊？」
蛇仔郎君：「啊就囥佇咱往擺不時得囥的所在。」啊今也講：「好啊，我來提。」
七尋八尋，好佳哉，去予尋著，尋著提來安呢。真濟代誌，伊攏介像真生疏，彼个時陣，
蛇仔郎君就發現講：「這个，有可能是將小妹共伊害死，所以講才會伊裝做小妹的模樣卜欺騙我。」
蛇仔郎君亦少許仔譜譜仔知影，但是無足了解。
有一日，蛇仔郎君去彼个古井的所在，得汲水，啊某佇彼个古井死，伊變做一隻鳥仔，
真水的鳥仔，佇古井內底。蛇仔郎君去汲水的時，這隻鳥仔佇彼：「hi1 hi1 hi1，目睭予屎糊，
大姨掠做姨仔某。hi1 hi1 hi1，大姨當做姨仔某。」哇－，
彼蛇郎君聽著講：「這是啥物代誌？安怎呔會彼隻鳥仔安呢講？」
蛇郎君就講：「hoo2－，你這隻鳥仔，你擱會講話，啊你呼若是講是阮兜的話，
抑是講你卜住阮兜的話，你就歇佇彼桶仔，予我通共你轉來飼。」啊彼隻鳥仔tsong5仔佇彼桶仔，
伊就汲起來。卜轉來的時，彼隻鳥仔歇佇彼个扁擔頭，蛇郎君擔水，伊就歇佇扁擔頭的所在，
就予伊擔轉去。伊就共準備一腳、hoo2－，用銀做的鳥籠仔，哇－，就共伊飼，佇彼共伊飼。
這隻鳥仔真乖，真水，因為伊就是伊的某來變成的。所以講，每一日，伊若卜去佗位，
就逮伊出門，真乖、真聽話安呢。
有一日，伊講卜出外去，就無予伊逮，講出去安呢吹風曝日毋好，所以講共關佇厝。
啊彼个豬屎公仔第二查某子就佇彼講：「hoo2－，這隻鳥仔攏含蛇仔郎君赫好。」
啊伊就去共看，就真怨妒。走去共看的時，彼隻鳥仔佇彼來共伊笑講：
「羞羞羞，見笑，抺阮的芳花粉，用阮的金柴梳，抹阮的茶仔油。」
講不時啊共：「hi1 hi1 hi1，見笑，抹阮的茶仔油，梳阮的金柴梳，擱用阮的芳花粉。」
哇－，伊聽了講：「ai3－，這毋若像阮小妹仔？好喏，你會狡獪。」講tsong5仔共掟予死。
哇－，蛇仔郎君出外轉來的時，伊就共伊講：「啊咱彼隻鳥仔死啊啦，毋知影安怎安呢，
可能去予貓仔抑是啥咬著。」蛇仔郎君佇彼真艱苦心，
就佇彼來將彼隻鳥仔掠去埋佇一苞竹仔的竹腳下面，伊就真毋甘，呰乖的鳥仔安呢來死去。
哇－，隔轉年，彼苞竹仔特別發一枝竹仔真水，彼色緻真水，竹皮亦真金滑、真好看。
啊蛇仔郎君就講：「好喏，這枝竹仔特別水。」就共剉起來，就共做一个椅。
彼陣的人，椅仔攏家己做，做一條椅，啊就咧真舒適，就咧，到安呢hoo2－，真舒服。
因為這个椅彼个竹仔是某變的，所以講蛇仔郎君若佇彼坐的時，就真舒服，伊就安呢搖咧搖咧真舒適呼。
啊阿婆真歡喜就共挾轉去，挾轉去燒燒，佇就佇紅龜粿的邊仔共咬一塊看覓仔，哦，呰好食，呰糗呰好食，安呢。
伊就hoo2，驚冷去，就用彼棉績被共蓋咧，用一个布仔包咧，用棉績被共蓋咧，哇－，講等子轉來，
卜予子食點心，卜予子食，hoo2－，足久毋捌食著赫好食的物件，安呢。子轉來，
伊講：「咱的被彼，你的眠床的被彼有一塊紅龜粿你提來食。」彼子真歡喜，就入房去，
被一下掀起來講，那有一个查某子赫水，睏佇彼眠床頂，亦擱共伊安呢笑咧、笑咧，hoo3－，
彼實在有夠水，講偌水就有偌水。啊彼个查甫囝仔安呢，趕緊走去共因老母講，
講：「母啊、母啊！你講彼有紅龜粿你騙我，彼一个查某囝仔佇彼睏呢，真水呢！」
伊講：「呔有查某囝仔得睏？啊就明明我囥一塊紅龜粿佇彼，呔有查某囝仔？」
阿婆仔就入去，講：「he2－，啊查某囝仔，你按佗位來的？我呔無看著你入來？
你呔佇彼得睡？」伊講：「你看，阿婆仔，我的衫裙予你咬一角去，你有看著無？
予你咬一嘴去，你有看著無？」阿婆仔著一驚講：「ai2，有影哦！」
「我就彼塊紅龜粿變的啦。彼塊紅龜粿就是我的附身，因為我就是蛇仔郎君的某、
豬屎公仔的第三查某子啦。」哇－，彼个少年仔講：「he2－，這後擺仔若予我做某，毋知影偌好咧！」
老母就講：「好啊，你若大漢，才予您結做翁仔某。」安呢呼。
哇－，有一日，彼个阿婆仔攏佇路仔邊彼得摳草，佇彼菜園仔得摳草。
蛇仔郎君逐日卜經過愛按彼過，逐日過的時，這个蛇仔郎君亦真幽默、真笑詼，真愛講笑，
就問彼个阿婆仔：「阿婆仔、阿婆仔！你每一日佇遮摳草呼，拒到赫搰力，啊你一日攏摳偌濟？
啊這摳幾枝你敢知影？你敢有共算？」安呢呼。彼阿婆仔按早仔摳到晝摳到暗安呢啦呼，逐日攏安呢。
有一日，伊轉去就共彼查某囝仔講，講：「he2－，彼蛇仔郎君足趣味的呢，逐日都問我看摳幾枝草啦，
啊咱呔有彼个時間去共算呼？麼算未了赫濟安呢啦呼。」
彼查某囝仔共彼个阿婆講：「你明仔載去摳草，伊若擱問你呼，你就共講，
講：『抑無我問你呼，啊你一日安呢呼，彼隻馬，你逐日佇彼坐，逐日攏逮你呼，
啊彼隻馬一日落幾支毛，你知影無？你有共算無？抑是彼隻馬身軀頂所有的毛幾支你敢有共算？』」
真正天光，去的時，佇彼摳草，蛇你郎君就擱問伊講：「哇－，阿婆仔，啊你今仔擱摳幾枝草你有算無？」
阿婆仔講：「安呢啦，摳幾枝我毋知啦呼，但是，我問你一句話呼：henn7－，你安呢逐日得騎彼隻馬呼，
啊彼隻馬逐日的馬毛落幾支你敢知影？啊你逐日共坐，彼隻馬伊身軀頂攏總有幾支毛，你敢知影？」
蛇仔郎君聽聽e0，真愛笑，伊講：「曷有法度算呼！」啊就一下就落馬，講：「ai2－，阿婆仔，
你呔呰巧會曉問我安呢？」伊講：「毋是啦！就阮厝彼个查某子共我講的。」啊伊就恟恟記講，
彼个查某囝仔共伊交待講毋通予人知影，伊住佇彼。啊伊就講：「ai2－，恟恟煞講出來。」
蛇郎君講：「啊你就無查某子，呔有查某子，我就毋捌看過，啊你毋去共人偷的？」
伊講：「毋是啦！」啊就，伊共騙講：「啊就阮誰的子啦，來佇彼住啦！」安呢啦呼。
啊哇－，就去，去到彼个，蛇仔郎君講：「來啦，抑無來您厝，我來看覓仔，看足水無？」
講：「足水哦！」安呢呼。因為這个查某囝仔有共啊婆仔講伊是蛇仔郎君的某、豬屎公仔的第三查某子，
所以講伊就帶伊去。哇－，伊經過呰爾濟的苦楚，啊這陣擱重做彼个人體。」二个佇彼歡喜到流目屎。
蛇仔郎君共伊講：「你暫時住遮呼，有一日我會你轉去。」哇－，啊就蛇仔郎君就利用機會就轉去，
轉去就共彼个第二姨仔，伊講：「he2－，咱有一隻豬母呼，成歹，伊攏會咬人，hoo2－，
一寡伊彼的同伴呼，攏共咬到安呢，hoo2－安呢、安呢流血流滴，有當時仔予咬咬死，真歹，
彼隻卜共刣掉。」伊講：「啊豬毋呔卜共刣掉？」「啊就毋，歹就來共刣掉。」hoo2－
，就佇彼磨刀，磨歸晡久，磨到一支菜刀安呢白閃閃，真利呼安呢。蛇仔郎君就去彼个溪溝仔彼
，掠彼个蜈蜞、掠幾隻蝦仔、掠幾隻魚仔，用一个面桶，就共囥咧；囥咧就共捧轉去，叫彼个姨仔某，
講：「你來看覓影咧，這个蜈蜞、魚仔呰恁濟，你來共看覓，真趣味。」
啊彼个大姨仔某就真正佒佒佇彼看，蛇仔郎君就共伊講：「你看，彼蜈蜞呼，彼種蜈蜞，
就是親像我講卜共刣的彼隻豬母仝款，你看伊夾佇彼个魚仔的頂面，佇彼得共彼隻魚仔血，
因為彼隻魚仔若予伊了，彼隻魚仔就死去。你看，彼隻蜈蜞的腹肚直仔大起來，換伊得享受，
啊彼隻魚仔予到卜死卜死。」因為蜈蜞是血的物件，所以講咱知影，過去咱若較老一輩，
佇彼个田得搔田草的時，hoo3彼蜈蜞若來夾著毋知影，食到一條若掌頭仔，咱的血攏予伊了了。
所以講，彼蜈蜞亦是一个真的動物。哇－，安呢就佇彼佒佒看得，蛇仔郎君彼个第二姨仔毋知影，
伊講：「hioo3－，有影就著毋，呔赫夭壽！」伊毋知影伊家己擱比彼隻蜈蜞擱較夭壽。
蛇仔郎君就用彼支菜刀，伊抵仔佒佒得看的時，tsong5仔共頭共斬落，就死啊。
死啊就共伊埋起來，埋起來的時，伊就去彼个佇阿婆仔彼彼个查某囝仔，伊以前彼个某，
就是豬屎公仔的第三查某子轉來。轉來就佇彼過著真幸福的日子。
所以講，佇這个故事的內面，就是得勸世，予這的細子亦好，咱這的大人亦好，
這故事的內底的內容，就是講一个人毋通做歹，一个人就愛看了會開、看較遠咧。
親像豬屎公仔彼个大漢查某子、第二查某子，第二查某子伊就是歹心腸，
伊為著卜霸佔小妹的丈夫，伊彼的厝，伊彼的財產，所以講，伊就佇彼來用盡辦法，來害伊的小妹。
小妹變鳥仔，伊擱共伊掟予死；變竹仔，伊擱共伊燒掉。所以變佇這種情形下，伊來予蛇郎君斬頭，
亦是一个應得的這个罪過、的罪惡。因為伊怎樣來害死伊小妹，伊就怎樣來報應。
所以講這个故事，是一个勸世、勸世這的後代人，您若是講卜做人做事，所有一切，
攏都愛重實，毋通虛假；啊做序小的人，都愛有孝序大人。親像豬屎公彼二个大漢查某子合第二查某子，
伊無有孝老父，所以講伊當得著赫爾好的幸福，赫爾好的快樂。伊彼个第三查某子有有孝，
伊事事攏順服老父，所以講伊所得著的報應是幸福、美滿的家庭。
所以講，古早人就用這个真濟短短的這个神話故事，來教示這的序小，
這的序小通好永遠會當做一个真正直的人、真正常的人，佇社會上有路用的人。
所以講，過去的無啥物這个冊通好教示這的子兒，就用這个故事來教示子兒卜安怎做人，
就愛怎樣來做人才會當得著好報。人俗語講：「有好的行為，有善良的行踏，就有好的報應。」
安呢呼，我就講用這个故事，擱來流傳落去，予這的下一輩的人，擱會曉來分享，擱一代一代來傳落去。
用這小小的故事來做教育，來做教示序小的一个好的模樣。這故事就到遮來結束。
|
|
發表於 2015-5-14 09:09:46
