一句問，一句還；無問，恰清閒。

草薰風

一句問，一句還；無問，恰清閒。



即句俗語主要咧強調，一個人唔通傷雜插(chhap4)，愛管閒仔事，安爾有當時會顧人怨，家己嘛嚥氣。

俗語講：「家己煩惱無夠，煩惱別人來鬥」，有的人足愛管代誌，啥乜(mih4)代誌，伊都亦卜插一跤(kha)，講恰好聽是「熱心」，另外一個講法是「雞婆」。其實每一個人，攏有伊私己的秘密，無想卜互人知。譬如：交查某(甫)朋友、參加聯考填志願、揣(chhoe7)頭路、拍官司、生理失敗走路等。所以除了當事者主動問意見，抑(a2)是要求鬥跤手，若無徛佇親情(chiaN5)、朋友的立場，只要表示關心著會使(sai2)，無必要過問傷濟(che7)，免得傷了大家的和氣。所以咱的祖先即句「一句問，一句還；無問，恰清閒。」的講法，是相當符合現代輔導理論的。

參即句俗語有相關：

家己煩惱無夠，煩惱別人來鬥。
有功無賞，拍破著賠。
一日無事，小神仙。
公親變事主。
　


〔註〕

一句還：「還」heng5，讀台語音「刑」。指答覆、回應的意思。
恰清閒：「恰」khah4，讀台語音「卡」。指比較輕鬆沒事的意思。