烏 手 指

草薰風

烏 手 指


有一個叫做阿德也的少年家，參阿母滯佇(tua3 ti7)庄跤所在。有一日，阿母共阿德也講：「汝已經大漢矣，愛家治出去奮鬥、拍拼(phah4 piann3)，做一個有路用的查甫囝(ca1 poo1 kiann2)。」
阿德也抱著依依難捨的心情離開阿母，沿路行到一座山跤(kha1)，拄(tu2)著一個老阿公仔負(phainn7)一大包米， (chua7)一隻狗仔，佇路裡咧行。阿德也誠好心，緊倚(ua2)去共老阿公仔湊(tau3)負米。
行幾何里路，才知老阿公仔 兜(in1 tau1)滯佇山尾溜。為著卜共米負上山，阿德也流甲規身軀汗。毋過，阿德也無受氣，猶原笑笑共米負到老阿公仔 兜。
老阿公仔看阿德也跡(ciah4)好心、跡骨力，知影伊是一個可取的少年家。著佇阿德也卜離開的時，送伊一跤烏色的手指，連身邊迄(hit4)隻狗仔嘛送予阿德也。
老阿公仔共阿德也講：汝毋通看即跤手指烏趖趖(oo1 so5 so5)，這(ce1)是寶貝喔！汝心內若想卜愛啥乜(siann2 mih8)物件，只要共伊掛佇手裡(lin0)，輕輕仔挲(so1)三下。喙(chui3)裡唸：「烏手指，烏手指，做好心，守規矩，天公伯仔，真歡喜。」安爾著會變出汝卜愛的物件來。
阿德也落來到半山腰，感覺腹肚淡薄仔枵枵(iau1)，想著老阿公仔講的話；想講即碼(cit4 ma2)若有一桌好食物通食，毋知卜偌仔爾仔(lua7 a2 ni1 a2)好咧。就共烏手指掛佇手裡，輕輕仔挲三下。喙(chui3)裡唸：「烏手指，烏手指，做好心，守規矩，天公伯仔，真歡喜。」
          哇！塗跤真正出現一桌好食物，有魚有肉、有雞有鴨，佫有菜佮(kah4)。阿德也誠歡喜，著緊坐落來食腥臊(chenn1 chau1)，唅(ham7)迄隻狗仔嘛食甲飽嘟嘟(tu1 x)。
無疑誤，即個情形予路邊一個剉(cho3)柴的看著。剉柴的起歹(phainn2)心，想卜共即跤烏手指騙過來。伊倚去共阿德也講：「少年的！家治一個人食跡濟(ce7)好食物，無酒通 ，實在足無彩的。我遮(cia1)拄好有一灌酒，我請汝，咱(lan2)做伙來 ，好無？」
毋知好 (bai2)的阿德也，真正參剉柴的做伙 酒。 無兩喙，阿德也著醉茫茫倒佇塗跤咯(loo0)。剉柴的緊倚去剝(pak4)阿德也的烏手指。無一下仔，迄跤烏手指著去予剉柴的搶去矣。
一直到甲日頭落山，阿德也才清醒起來。看著烏手指無去(bo5 khi0)，毋知卜按怎(an2 cuann2)才好。即個時陣，狗仔開喙講話咯。狗仔共阿德也講：「小主人，汝毋免煩惱，我會曉鼻人味。咱順剉柴的跤跡(kha1 jiah4)，來去 兜共烏手指討轉來。」
        來到剉柴的 兜，已經半暝矣。剉柴的將門關甲密密密(bat8 x x)，咧睏咯。阿德也無法度入去 (theh8)烏手指。拄好一隻貓仔行對後尾門仔過，狗仔看著即個好機會，著緊走倚去共貓仔掠稠(liah8 tiau5)咧。講：「汝入去剉柴的遐(hia1)，將烏手指咬出來還阮(guan2)小主人，若無，汝著知慘。」
毋過，門關稠咧，貓仔嘛是無法度入去。註死毋死，一隻鳥鼠(niau2 chu2/chi2)唯牆仔邊的鳥鼠空趡(nng3)出來，貓仔著將鳥鼠掠稠咧。講：「汝入去剉柴的遐，將烏手指咬出來予我，若無，我著卜共汝咬予死。」
鳥鼠無可奈何，只好踅(seh8)還頭趖(so5)對原路轉去。來到剉柴的身軀邊，卜揣(chue7)烏手指；毋過，揣幾何遍攏揣無，毋知剉柴的將烏手指藏佇「佗位」(tue2)。
鳥鼠急甲規身軀汗，雄雄看著剉柴的喙髀(chui3 phue2)胖胖(phong3 x)。io9，原來剉柴的將烏手指含(kam5)佇喙裡，莫怪咧揣無。鳥鼠著用伊的鳥鼠尾佇剉柴的鼻空撓(niau1)咧撓咧，無兩下仔，剉柴的拍一下咳啾(ka1 chiu3)──「哈啾！」著將烏手指呸(phui3)出來咯。
鳥鼠緊將烏手指咬出來予貓仔，貓仔佫咬來予狗仔，狗仔才咬來予阿德也。阿德也 著烏手指誠歡喜，透暝緊走轉來阿母的身軀邊。
阿德也將伊所拄著的代誌(tai7 ci3)，講予阿母聽。毋過，阿母講：「輕鬆錢，心虛微(bi5)；流汗錢，千萬年(ni5)。輕鬆得著的錢，無偌久著會烏白開了了；家治拍拼趁的錢，才會寶惜，才會勤儉(khin5 khiam7)。少年人 使規日閒閒，卜食毋討趁；若無，以後著會荏懶(lam2 nua7)佫貧惰(pin5 tuann7)，變成一個無路用的人。」講了後，阿母著將烏手指掞(tan3)落門口埕的鼓井內。
阿德也聽阿母的話，逐日認真拍拼，流汗趁錢，趁足濟(ce7)錢轉來有孝阿母。母仔囝過著比以前佫卡幸福、佫卡快樂的日子。
迄跤烏手指咧！雖然足濟人落去鼓井卜揣，毋過，到今(tann1)猶揣無。
　
~~黃榮泰先生編著 2001.11~