圍

絕對官僚

圍

其實，像阮這種比狗尾草
更加平凡的庄腳人，
根本無想要出風頭。
阮只是希望世世代代子孫
在這片土地繁殖，
根本無想要去抗議什麼。
後來，化工廠、電鍍廠
在庄內設廠。阮也真歡迎。
地方發達，做工機會增加，
日子一定卡好過。
想不到，污染一波一波湧來，
比海水漲潮更加厲害。
污濁的水不知要安怎吞落腹？
無論行到佗位，臭味攏跟著咧，
時間一久，洗也洗不落。
阮只好去拜託村長，懇求工廠，
不要閣污染下去。
廠方經理講：政府攏無講話，
您是不是要來敲油？
阮再三陳情，攏無人理睬，
親像一片荒野的番薯，
自生，自滅。
阮實在無辦法，只好學電視那套，
大家開始搭棚，圍廠。
收音機、新聞開始報導，
政府派人來了解，
廠方完全換了另一款嘴面，
講尹本來就有誠意要改善，
而且要拿出一筆資金回饋地方。
大家聽到，攏歡歡喜喜，
棚仔拆掉，就散去了。
散去了。像狗尾草的芒
四處飄飛。漸漸
大家就忘記這項代誌。
有一日，三更半暝，
後生一面哭，一面抓身軀，
我仔細看伊的皮膚，
一片一片紅斑。
一片一片紅斑，
親像癬同款，一層一層
將我，包圍。

文出：古雅台語人