一杯茶

絕對官僚

一 杯 茶

立冬後兮歇睏日,
吹面不寒東北風,
曝日無熱早起時,
請裁坐置公園兮草坡頂,
泡一壺茶任在時間溜溜去,
偷得浮生半日閒.

向大度山彼爿看去,
彼條通海兮大通路猶原鬧熱chi4 chi4,
才無偌久進前,
逐工開車置病院和茨內中間跑來跑去,
舉心結一丸兮日子,猶親像置目珠前發生
手底捧兮一杯茶,
您兮形影置內面踅來踅去...

啥物茶上好食?

一世人食過不計其數兮好茶,
不曾看您這爾滿足兮表情.
雙手捧著這個幼細兮茶甌仔,
您目珠 kei4 kei4,喙唇尖尖,
若歕若哈這杯茶,
哈這杯您這世人上尾兮一杯茶...

這一幕,欲似拍模印置我兮心肝內
這杯茶,芳味久久不散-在我兮呼吸內
苦甘啊-苦甘,又復酸ko4 酸ko4

這是啥款兮滋味?

就要茲個時辰,才會明白俗語話講-
在生一粒豆 加贏死孝豬頭
亦才了解 歐陽修 瀧岡阡表所講兮-
每一頓飯思親兮心情

一杯茶,我食落喉,
食未落彼款凝置心肝頭兮思念.
(百日紀念文)

來源：古雅臺語人