人生有情淚霑臆

絕對官僚

彼一日 咱手牽手的場面 猶原在我心肝頭燒煦煦
二冬後 我遂感到遮款記憶 親像未當講出喙的愛戀
凝佇心肝頭  吞未落  吐未出

世間代 無照常理行
人情事 總著看予開

舉心所愛所感動的人情世事
準就是永遠我的 未變化 未消失
無意在一夜之間 風雲變色 全然走精去矣

怨嗟、切心、捶心肝、吐大氣
問蒼天   遮是啥款道理...
跤手軟 心肝硬 無愛睬
心所愛  變作  心所慟

遮日  慟原在慟
愛縱是失意   並無失志
每一遍若是看到彼條心連心手牽手的台灣萬里長城
在歷史上的今仔日浮出來
阮的心肝就變軟  鼻頭就起痠  目眶就紅

心所愛 愛入骨 變做阮的血、阮的肉
血流掉  會更製
肉挫傷  將再生
意著是 - -
人生有情淚霑臆　 江水江花豈終極

作者: 蘭臺讀書人