海味

絕對官僚

【台語詩】海味 ／陳潔民

空氣內底浮著
鹹鹹的海味
坐佇涼亭仔跤
手提鑽仔
斟酌測力
撓蚵仔殼的手
無歇過
細意撥出一蕊一蕊的
蚵仔花


一蕊一蕊的蚵仔花
溼溼軟軟
飽滇的蚵仔身
開出青白交錯的花
叨一個飼蚵仔的人
毋是向望美美的蚵仔花
養飼厝內的序細


塔甲若一座小山
蚵仔殼塔起來的夢
日頭跤
一工一工曝焦
蚵仔味鹹鹹
流的汗嘛鹹鹹
連夢中，攏鼻著鹹鹹的
海味

坐竹排仔去看顧蚵仔
一枝一枝的竹仔，插佇海底
一貫一貫的蚵仔，藏佇海底
鹹鹹的海味
伴阮的青春時
已經佇蚵仔頂
結晶

文出：台文戰線