投奔

絕對官僚

【台語詩】投奔／陳潔民　　　

干單是投奔到有你的天空下

已經互我雀雀跳，著準講

只是路過有你的城市，甚至無機會

行佇你捌行過的路頂

啊！我是安怎向望

佮你呼吸共一片土地的空氣

無論山風涼無涼、嶺頂青無青

無佇你身邊的日子

身軀可能自由

心靈煞一工一工枯礁，我覺是

我已經無心矣──

投奔到有你的天空下

就使見未到你，嘛互我心臟一直起顫

才雄雄發覺，伊猶存在

想卜呼吸你呼吸的煞呼吸未到你呼吸的

想卜參抱你參抱的煞參抱未到你參抱的

投奔，咁毋是自由的咧？

哪會我的心，有淡薄仔擰的－－

疼

註：
雀雀跳（chhia̍k-chhia̍k-thiàu）：雀躍。
就使：縱然。
起顫（ khí-chùn）：顫抖。
參抱（saⁿ-phō）：擁抱。
擰（liàm）：擰、捏。