去八卦山曝日

絕對官僚

【台語詩】去八卦山曝日－－送互我的阿母／陳潔民

天氣已經

寒真久矣

逐工溫度攏真低

昨，總算有溫暖的日頭

通互我帶汝去

八卦山頂曝日



日頭溫溫

清風微微

曝日真舒適

互人目睭瞇瞇

一直想卜睏去



阿寶嘛來山頂陪咱曝日

陪汝講現在、講過去

毋知汝曝日

曝得咁有歡喜？



汝講跋倒了後

害我為著卜照顧汝

逐工攏真忝

講甲目屎撥未離

其實

我體會到汝佇阮細漢的時

毋知偌仔呢辛苦

照顧抑是紅嬰仔的阮

即嘛會當佇汝身邊照顧汝

是互我機會報答汝



我是一個幸福的囝仔

感謝上天

互我有經濟能力

好的身體

閣有時間

通陪伴汝



若無汝少年時的犧牲

我就無今仔日

阿母

我感謝汝



八卦山的日頭

猶然笑微微

看咱三個人

佇茲曝日

心情真歡喜