【台語散文】心內有詩，人生就嫷

絕對官僚

【台語散文】心內有詩，人生就嫷   ／陳潔民2009.12.1

生活內底，每一角位攏是詩。我愈來愈相信，每一個人的心內，攏住一個詩人，攏有一粒詩心。一個人若是有赤子之心，就有成做詩人的條件。

差不多十年前，我惟靜宜大學中文研究所出業。一方面去沙鹿高工做國文科的實習老師，一方面嘛接著靜宜大學的聘書，入去靜宜大學通識教育中心人文科教冊，擔任「台灣文學欣賞」課程的兼任講師。一年了後，我實習結束，入去彰化師大附工做國文科專任教師。旦開始，因為興趣，雖然高中教師的工課真無閒，我猶原無辭去大學的教職，繼續佇靜宜大學教冊教三冬。落尾，壓力愈來愈大，必須專心投入高中國文教師的工課，無機會繼續教「台灣文學欣賞」的課，當然是可惜，因為我碩士論文就是研究台灣新文學之父賴和先生的漢詩，無發揮的空間，有淡薄仔遺憾。回顧佇靜宜大學的這三冬，我就有教大學生寫台語詩，而且捌要求其中一班學生編出一本台語詩集「佮台語詩初戀」，彼是一本影印的詩集，無精美的印刷，攏是學生囝仔怹家己編輯出來的，算是一種紀念。

佇高中教冊的期間，我若掠著機會，就會介紹台語詩互學生囝仔看，阮彰工的學生囝仔佮其他的高中生無共款的所在，就是因為查甫囝仔卡濟，所以大部分的學生，怹平常時攏講母語，母語就是怹的生活語言。我佇遮教冊，看到台語文學的光線，透過台語詩的教學，我嘛看到學生囝仔怹真幼路的詩心，佮功課好歹，無啥物關係。

教高中生讀台語詩、寫台語詩，已經真濟年，只是，要看教到啥物班。佇升學考試第一、專業技術嘛第一的高職學校，連「國文科」生存的空間著真少，一禮拜干單三、四節課，閣卡免講台語文學作品，國文課本內底，加加仔一首望春風，一首阿爹的飯包。唉！除了吐大喟，閣會凍講啥物？毋閣，我並無放棄。只要教到相關的課程，我就會揣機會，互學生囝仔讀台語詩、學寫台語詩。因為安呢做的關係，我更加證明我頭前所講的觀點──每一個人心內攏住一個詩人，攏有一粒詩心，爭差是毋是有人去指點怹、將怹開發出來爾爾。

旦開始，卜鼓勵學生仔寫詩就真困難矣，閣卡免講是台語詩。怹攏會問我一個問題：「台語的字卜安怎寫？」我就講「我手寫我喙」，將喙講的話用筆寫出來就好，先用漢字寫，無要緊；用啥物字來寫，攏會使得。學生仔嘛會講：「我毋捌寫過詩，未曉寫詩。」我攏會用諾貝爾文學獎詩人赫曼赫塞的一句名言鼓勵怹：「寫一首歹詩的快樂佮趣味，卡贏讀一首好詩。」詩人誰攏會使做，只是作品的「質」懸低的問題。只要肯寫，就是學做詩人的第一步，好抑是歹，就看家己的拍拼。

雖罔毋是每一個人都有真懸的才情通創作，毋閣靠認真，會當彌補天分的不足，加看詩、加讀詩、加寫詩、加發表詩、加聽人的看法，一定會進步。學生仔怹寫詩，拄交來互我看的時陣，我定定那看那愛笑，因為怹用的字真天才，舉例如下：「哇母哉呀一去倒」就是「我毋知影伊去叨」；我嘛定定愛「臆詩」，怹的用字，我定定臆甲半小死；看到怹寫出來的詩，我真歡喜，嘛真感動，這就是咱教囝仔寫詩上好的回報。

台語界的詩人，聽講已經有一寡仔人投入台語文的教學，我嘛希望閣卡濟台語詩人毋若是家己寫詩就好，要繼續將台語文學傳承落去，因為咱總有一工會先返去，若卜互台語文學未死，一定要揣機會栽培台語文學新的幼芛。

來源：台文戰線第19號