起鼠尾

絕對官僚

舊年（92年）1暑假的某一日，食中晝飯2的時，拍開電視，聽著電視主播報導新聞，講：「台南西南部海面，起一陣幾仔十年真罕得見的『龍捲風』---」聽伊將「龍捲風」讀作「捲（kńg）螺仔風」，轉去別台，也有人讀作「絞（ká）螺仔風」，我聽著怪怪。會記細漢的時，阮所講的「絞螺仔風」是指發生佇草場抑是平地，會捲咧走的小小的風，絕對毋是「龍捲風」。

我隨問我的翁婿：「台語的『龍捲風』按怎講你敢知？」伊講：「毋知」，我問伊細漢敢捌3看過「龍捲風」？伊講：「毋捌」，袂怪得4伊毋捌這个詞。

會記細漢蹛里港的時，應該是佇民國四十幾年。有一日，我聽著大人咧喝5「起鼠尾喔！起鼠尾喔！」我綴6大人所指的方向看去，佇阮兜西爿（阮兜是坐西向東）的天邊，有一條真明顯的烏雲，一直捲起裡天頂，彼時陣7，我才知影啥乜是「起鼠尾」，毋過，彼時陣我猶袂曉講華語，毋捌聽過「龍捲風」的這个語詞。

四、五十年來，因為毋捌閣聽著「龍捲風」的消息，所以根本將這个詞袂記了了矣，這碼閣再聽著「龍捲風」的消息（可惜無閣親目看著），隨予我想著細漢所聽著的「起鼠尾」。頭起先，我毋知欲按怎寫，掠準是「起厝尾」，為著慎重，我認真去查詞典，台語閣真正有「鼠尾」、「鼠尾風」這个詞，「起鼠尾」應該是起「鼠尾風」的意思，我一時歡喜甲那親像去扌去（khioh）著8寶仝款。彼一「下昏」（ing9）9，我聽李富城的氣象報導，伊報一个「龍捲風」的氣象圖，彼个圖形，就親像一隻倒笑笑1的老鼠仔，咱所看著的，就是老鼠仔尾的部份。喔！這時陣，我才感受咱台灣人的老祖先實在有夠利害，（in）毋捌科學，閣知影號這个真科學，真具體的名詞。

華語的「龍捲風」，有大中國的文化，彼款文化，虛無抽象，毋捌看過龍，毋知影「龍」生做按怎，就真崇拜「龍」，認為「龍」來無影去無蹤，所以，便若是神秘的，珍貴的，偉大的，攏佮「龍」有關。「龍」又閣是咧管水的，所以佮「水」有關係的，就佮「龍」有關係，可能古早中國的「龍捲風」攏起佇海面，（in）毋知離海真遠的陸地，嘛會起「龍捲風」。

台語的「鼠尾風」，有台灣人的智慧，有台灣人的文化，是台灣人特殊的用法。研究台語十幾年，真正愈發現台語的嫷，無一字無來源，無一字無根據，身為台灣人，哪會會使袂曉講台語，共祖先的文化廢了了咧？

註解：
1.      舊年：去年。
2.      食中晝（tàu)：吃中餐。
3.      捌（bat)：曾經。
4.      袂怪得：怪不得，也可說「莫怪」。
5.      喝（huah)：喊。
6.      綴著（tuè tio̍h）：跟著。
7.      彼時陣（hit sî tsūn）：那時候。
8.      抾（khioh)著：撿到。
9.      彼一「下昏」（hit tsi̍t ing9）：那天晚上。「下昏」，合音讀升高調。

來源:海翁台語文學雜誌第32期