豬油攪飯的滋味

絕對官僚

拄（tú）1搬來台南的時，雖然有分配宿舍，毋免交厝稅，有配給軍米，有飯通食，毋過，干礁/那靠阿母一个人，做尪仔衫的收入，欲（beh）2維持一个家庭的開銷，實在有夠艱苦，好佳哉有大姨佮三姨的幫忙，才有法度渡過這个難關。

會記得彼時陣，上歡喜的，就是看著大姨佮三姨來阮兜。若來阮兜，絕對無空手，攏會（kuānn）3菜抑是買一寡仔好食物來，尤其三姨驚阮無物（mi̍h）配4，有時會 一桶豬油來，阿母若無閒抑是無錢通買菜的時，阮就會煮燒飯攪豬油，閣參一點仔豆油、蒜頭，彼（hit）種芳貢貢，貢貢芳的滋味，真正是人間上芳的滋味，雖然無物配，阮兄弟姐妹就食甲毋知通飽，逐日攏過甲足快樂。

阮三姨真有心，伊拄著仔就會來巡巡看看咧，阮兜彼桶豬油若佇欲食完，伊就閣來。彼時陣雖然無錢，阮嘛毋捌枵（iau）著5，只要有一桶豬油，一罐豆油，阮一家人食飽著無問題矣！

人講：「好物毋值飽人食，枵時白水食會甜」，這碼的人，攏食傷（siunn）好6，驚肥，連炒菜都毋敢囥（khǹg）7豬油，莫講豬油攪飯矣，真可惜，毋捌試過燒飯攪豬油的人，絕對毋知啥乜叫做「人間美味」。

雖然阮這碼的生活攏誠好過，欲食啥乜就會使食啥乜，毋過，細漢彼種豬油攪飯的芳味，猶是永遠予我上懷念的。

註解：
1. 拄（tú）：剛剛。
2. 欲（beh/bueh）：要。
3.（kuānn：提。
4. 物配：配飯的菜。
5. 毋捌枵著（m̄ bat iau tioh)：不曾餓過肚子。
6. 傷（siunn)好：太好。
7. 囥（khǹg）：放置。

刊佇牛津文藝雜誌第三期