SPA

絕對官僚

現代人的生活真緊張，壓力真大，所以真濟人有閒的時，愛開真濟錢去做SPA，來調養家己，予家己輕鬆一下。其實，佇我囡仔時代，早就不（pu̍t）時咧做免費的SPA矣，彼（he）1就是去泵浦仔2沯（tshiâng）水3。
草地囡仔，喙裡唸阿母教的囡仔歌，藍天做蓋，綠地做毯（thán），白雲做伴，風聲、雨聲、蟲聲、樹葉仔聲，攏是足好聽的音樂，毋免開錢，毋免揀時陣，不管好額散，逐家做伙tshit迌，只要有人提議，隨時都有真好耍（sńg）4的tshit迌方法，規片的大自然攏是阮tshit迌的好所在。

彼當時社會風氣真好，囡仔溜溜去，只要食飯時間到，囡仔自然就會轉來食飯，父母毋免煩惱囡仔會出代誌。佇真濟tshit迌的方法中，上蓋好耍的，記憶上深的，會使講是去泵浦仔沯水。

草地一四界攏是水田，遮的田地，需要真濟水，所以佇水田邊，攏有人裝泵浦仔抽地下水來淹田。泵浦仔抽起來的水真大港5，袂使直接灌入去田裡，會共田沖歹，所以做穡人會用磚仔做低牆仔，共抽出來的水閘（tsa̍h）起來6，就親像一个大水池，這个大水池設一个水門，欲淹水的時共門拍開一縫（phāng），予水勻勻仔流入去田邊的溝仔，才閣勻勻仔流入田裡，普通時水門就關起來。

若有人咧抽水淹田的時，就有人相招去泵浦仔沯水。四五个囡仔伴，毋驚日曝，也毋免換游泳衫，佇燒忽忽的熱人，跳入去清悠悠的水池仔，水深袂超過胸坎7，也毋免驚予水沖走，若是徛（khiā）蹛泵浦仔水的出口，抽出來的水，直接沖佇尻脊骿8抑是胸坎，真正是清涼閣刺激，有時予水沖甲徛攏袂牢（tiâu）9，逐家互相扶持，彼種感覺，比即碼的SPA好濟咧！

台灣原本有真濟好山好水，媠/嫷閣清悠，免開錢閣好耍（sńg）的所在，現代的人，袂曉寶惜大自然賞賜予咱的資源，樹仔剉（tshò）了了，溪仔變烏水溝，厝蹛山坡地，啉（lim）消毒水，配農藥菜，共家己逼甲無地通徛起，做罪喔！

註解：
1.彼（he)：借義字。
2.泵浦仔（phòng phù á）：抽水的機器。這裡是指用「幫浦」抽出水的地方。
3.沯（tshiâng)水：沖水。
4.好耍（s¡g）：好玩。
5.大港（tuā káng)：沖出的水柱很大。
6.閘（tsa̍h）起來：攔下來。
7.胸坎（hing khám)：胸部。
8.尻脊骿（kha tsiah phia）：背部。
9.徛攏袂牢（tiâu)：站不住。                                 
刊佇2007. 海翁台語文學  期