培墓

絕對官僚

        清明節是自冬節算起第一百空五日，台灣俗語講：「二月，踏草青。」遮所講的二月，是指舊曆（農曆）的二 月，也就是指清明的時。古早，逐家利用清明節天氣青清明朗的時，去培墓順紲郊遊，叫做「踏草青」。台語的「培墓」華語叫做「掃墓」。台語的「培墓」比「掃墓」有較深的意思，「培墓」有「培土固實」的意思，除了共(kā)草仔亶刂（thúann）1清氣以外，閣愛共墓龜的塗，貼乎實，表現出對祖先的敬愛佮疼惜。

      培墓的祭品，以前愛準備十二碗，現代綴（tùe）時代慢慢仔簡化，一般的牲禮、果子、粿品、潤餅攏會使。拜完，剝卵殼，掖佇墓頂，表示送舊迎新；用石頭仔佇墓頂硩（teh）墓紙2（長方形五色紙），有的所在叫做「掛紙（kùi tsúa）」3，就是古早人「掛錢」的意思，表示這个墓已經有人來拜過矣。

         培墓，會當得著祖先的庇蔭，會當培（pūe）著福氣，所以袂 使家己偷偷仔去培墓，愛招兄弟姐妹做伙去培，才袂家己共福氣培了了。當然，這可能是咧鼓勵囝孫仔愛去培墓，毋通予祖先的墓荒廢去。

          清明去拜祖先的墓叫做「培墓」，阿若是過年時仔去拜墓，叫做「探墓」。孔子公講：「慎終追遠，民德歸厚矣！」就是叫咱毋通共祖先放袂記，常常數念祖先的恩情，這就是孝的表現。

         其實，台灣人培墓，無一定是清明，俗語講：「踏草青， 生後生。」閣講：「今年培新婚，明年培查甫孫。」台灣人的  傳統禮俗，若是囝兒序細結婚抑是添丁發財，攏愛去培墓，才 會得著祖先的庇蔭。

        俗語閣講：「三月節，食清明。」這是祖籍漳州的人，欲予伊的囝孫會記得 的清明是「三月節」，佮祖籍泉州來的「清明節」無仝。這有一個典故：「聽講，本來漳州人佮泉州人攏佇清明節培墓，有一擺，為著準備祭拜咧買菜的時， 雙方的太太發生衝突，引起漳泉械鬥，後來，經過官方的調解，規定漳州人佇 三月初三這日食清明。毋過，這碼的台灣人，並無分甲遐爾清楚，大部份攏佇清明節培墓。

          阮阿母佮阮大家（婆婆）就坮（tâi）4佇台南市國民路入去無偌遠的所在，欲去真方便，想著的時，阮兄弟姐妹就會去行行看看咧，閣有倩（tshiànn）5人顧墓，所以墓攏維持甲真清氣。逐擺我若去，攏有看著附近有一个墓前，花攏插甲真鮮（tshinn），毋捌看過蔫（lian）6去的花，顧墓的人講，這个墓 的後生7，差不多逐日攏來換鮮花，含伊的老母講一下仔話才離 開，雖然我毋捌看過這个人，我嘛聽甲真感動。這碼的社會猶有這種孝子，實在無簡單。

          佇遮，我特別欲講著一个台南市的名人－林文雄先生。林文雄先生，捌做過台南市市長，是我翁婿初中的同學，生做溫文儒雅，伊咧做市長的時，因為無啥會曉用人，所以佇市政無啥乜特殊的表現，毋過，伊確實是一位孝子。

     　 兜的墓園，本來佇阮大家的墓後，大約有三、四 十坪，伊做市長的時，阮若去培墓抑是探墓，有時會遇著，會含我的翁婿相借問。後來徙（súa）去附近，買一塊較大的墓園，看起來有成百坪，逐擺，阮若去培墓抑是探墓，就看著伊已經佇墓園，毋是咧沃水8，就是咧整理草仔埔，有時恬恬9坐佇墓邊，一直到阮敬拜大家含阮阿母的墓了後，欲轉去的時，猶看伊佇墓園，伊捌共阮翁婿講，伊若無去墓園含老爸講寡仔話，暗時會睏袂去。
        林文雄先生對祖先數念10的精神，予我真感動，也予我真敬佩。

註解：
1. 亶刂（thùann)：鏟除。
2. 掛紙（kùi tsúa)：又稱「硩（teh)墓紙）」。台灣習俗，掃墓時要修墳、祭墓，除草、填新塗、補草、補墓牌，祭完要用小石子將墓紙壓在墳上，表示有子孫來祭拜．「掛」，文讀音kùa，白話音kùi。
3. 硩（teh)墓紙：祭拜完後，長方形五色紙用小石子壓在墳墓或墓碑上。
4. 坮（tâi)：埋。
5. 倩人（tshiànn）：請人。
6. 蔫（lian；)：花木或水果等因失去水份而萎縮。
7. 後生：兒子。
8. 沃水（ak）：澆水。
9. 恬恬（tiām）：靜靜的。
10. 數念（siàu liām）：思念。