祖傳之寶－林央敏

絕對官僚

祖傳之寶／林央敏

永早，逐口灶攏有的祖傳之寶
阿祖傳阿公，阿嬤教阿爸
雖然分腔口，吥過唱仝調
有錢無底買，肯學自然會
吥驚人偷提，恰意公開討
代代生湠，四百年吥捌失落

經過四十年
一塊狗牌仔窒死台灣人
這項祖傳之寶恟恟變糞垃
阿爸無愛擱傳予子
阿娘教子著唱北京
講這肚量大，心胸闊，好時行

行到這當今                           
萬代祖公隨身紮的祖傳之寶
互少年的撣置壁角吹風曝日
糞垃車遘過都懶得收屍
阿公看著，心頭一陣酸疼
抾去老人會參阿嬤公家哺

老去的語言，哺出老去的滋味
只有老身所孵的溫暖，才會凍
安慰怹互孫仔看無上目的心情

來源：「台語世界」