春夏秋冬的夢(台語散文)

絕對官僚

    春天的風，微微仔吹佇（ti7）開滿「紫雲英」佮「油菜花」的田裡，一望無際的花海佮一排一排向南北延伸、擋風牆的青竹仔，tam2一下、tam2一下，衝向遠遠彼片紅紅強欲（beh）落山的日頭，雖然無鼻著花的芳味，毋閣（koh）感覺空氣清新閣透心涼，蝶（iah8）仔、蜜蜂佇咧suh花蜜，毋管天欲轉烏矣，猶原一蕊換過一蕊，也毋知in欲將花蜜紮轉去若遠的岫，厝面前彼條水溝仔水，向下塊厝long7-long7叫一直流去，樹尾溜欲歇暗的粟鳥仔袂輸咧鬥鬧熱「keh8-keh8叫」吵無停，黃昏的日頭像一粒紅色的氣球，共所有的影放長──放長──；作穑人的身影嘛像踏蹺（khiau）的lo3跤人，漸漸──慢慢──混合佇「夜」的世界，家家戶戶攢暗頓的煙筒管，沓沓仔霧出來的煙，罩tiam3大地，毋知外懸的天幕，為多采多姿的夕（sik）陽，增添幾分仔濛濛的美感。

來源:台灣閩南語朗讀文章選輯