|
一庄一俗石爺信仰
在關西統一健康世界﹙頭擺安著涵谷關﹚底背肚，有一條行路步道，指示牌寫等往石爺。跟著石碫仔直直上，行差毋多二十零分鐘，就會到石爺所在。石爺係兩個大石頭，面前有一垤平托位所，係分這兜信徒放供品使用。
初看之下，這摎一般石爺無麼差別，問在地范先生，佢講︰聽講頭擺清朝尾時節，有一位鄭統領渡等一位耕田人，來到這個所在，結果堵著原住民，原住民就愛殺這耕田人，這耕田人斯遽遽藏到石爺後背，正無分原住民殺掉。背尾這個耕田人為著愛承蒙石爺顯靈救佢，就準備三牲來答謝石爺，以後經過庄長宣傳，附近居民係有時運毋好，也係講細人仔毋好度，做盡來求石爺，都做得得到平安，就恁仰，石爺靈顯故事就緊傳緊多咧。還有范先生講︰這位石爺還有做四季福呢！參與拜人全部係金山里居民，錦山里人並無來參與。輪到人，會準備三牲來拜，問范先生，提著牲儀行這截路毋會累嗎？范先生講︰正毋會咧！準運動啊！有拜有保庇，這石爺會保佑人平安，當好哩！
四季福→〔農曆二月二日、四月八日、八月二日、冬至前一日〕
《 本帖最後由 草薰風 於 2011-2-4 19:58 編輯 》 | 
發表於 2011-2-4 19:55:53
