一年新婦，兩年話拄，三年師傅。

草薰風

一年新婦，兩年話拄，三年師傅。


即句俗語咧描寫，嫁過門的新婦，第一冬是如何唯(ui2)無地位的「新婦仔」，事事項項攏順從，唔敢有任何的怨言。經過一段時間了後，因為環境熟似(sai7)，所以加減有家己的意見，有時不免會應(in3)喙(chhui3)應舌。時間一下久，若像學「師仔」工，經過三冬四個月了後「出師」共款，著開始想卜做老大，對別人喝起喝落。

佇軍中不時傳出「老鳥」欺侮「菜鳥」的報導，啥乜(mih4)無所不至的代誌攏有，按借錢、請客、、新兵操、拍死人…等，遮兮會共欺侮的老兵，當初時敢唔是唯新兵做起，應該上了解新兵的無辜才對。是安怎顛倒來欺侮新兵咧？主要是人性的「報復」，國語有一句話講：「若待媳熬成婆，有過之而無不及」，大概是咧(leh4)講即個道理吧！

參即句俗語相關的：

雜唸大家，出蠻皮新婦。
輒罵袂驚，輒拍袂疼。
輒見官不畏，輒食酒不醉。
　


〔註〕

新婦：sin1-pu7，新進家門的婦女，即俗稱「媳婦」
話拄：「拄」tu2，讀國語音「杜」。頂撞之意。
師傅：sai1-hu7，讀台語音「獅」「腐」，指某種技藝的專家。