一等二靠三落空，一想二做三成功。

草薰風

一等二靠三落空，一想二做三成功。

即句俗語，照字面的意思是，一個人做代誌如果干礁(kan1-na1)徛佇(khia7-ti7)原地等待，無卜踏出第一步，亦是一心想卜倚(oa2)靠別人鬥幫贊，若安爾伊所有的希望必然會落空、失敗。換一句話來講，一個人創造事業，如果事先若會當深入的思考，詳細的計劃，然後跤(kha1)踏實地一步一步去推動，若安爾成功必然會屬於伊的。俗語講「天跤下無迄囉(hit4-lo0)食免費的中晝頓」，咱必須愛付出代價，才會當享受成功的滋味。
在目前的工商社會，足(chiok4)濟人做事業無卜照起工，一步仔一步去拍拚，規工唔是空思妄想、著是心狂火熱，想講看會一步登天，一下仔囝著會當好額趁大錢、馬上成功出人頭地。莫怪咱的股票市場有百分之九十的散戶仔，逐日鬧熱滾滾；六合彩嘛誠時行，攏無退時，這完全反應台灣社會投機、速成的現像。有一句描寫台灣的神明進退為難的話：「無幾先錢，汝求伊亦求，卜互啥人恰好？無卜做半項代誌，日也拜暝也拜，真是互我為難？」，為著無卜互神明為難，我看咱愛靠家己計劃，實在去做，成功自然就會佇頭前等待咱啦。

參即句俗語相關的：
1.        一暝全頭路，天光無半步。
2.        做人著反(peng2)，做雞著筅(chheng2)。
3.        做人著磨，做牛著拖。
4.        貧憚著吞瀾(noa7)。
5.        家己栽一欉，恰贏看別人。
6.        看田面，唔通看人面。
　

〔註〕
1.        干礁：kan1-ta1，連音kana1，讀台語音「佳那」，只有的意思。
2.        天跤下：跤kha1，讀台語音「『尻』川」，腳也。此指天底下。
3.        台語保留許多古老的漢字，如 「跤」指腳、「糜」指稀飯、「有身」指懷孕。「走」指跑。「鼎」指鍋子、「細」指小、「伊」指他、「徛」指站…。