媽媽請恁也保重

李洪元

媽媽請恁也保重

我舊年10月初8假釋，恐嚇取財關10年，自龜山出來才知影物價上漲這呢嚴重，便當卡早一粒5、60箍，今嘛要100箍。找一個飯店住到隔日，普通賓館嘛欲1千700。我進去帶20萬，後來佇監所乎水塔壓傷腰椎，手術林林總總開銷，扣到剩2萬。人講自由的滋味，我一點攏袂歡喜。

阿生，42歲，廚師，台南

搭客運轉回故鄉新營，阮厝內人搬走了，我嘛毋知影怹搬去叨位。透過管區去找，才知影怹搬去隔壁庄，但序大人透過里長轉達，怹當作沒我這個人，若是我敢回去，怹明仔載就會搬家，後來阮媽媽叫里長拿二萬給我，乎我去看病。

我細漢不愛讀冊，爸爸憨慢講話，庄腳郎卡土性，教育就是打。厝內待不住，15歲上來台北，佇林森北路學日本料理，學7年，呷公司睏公司，存一百萬，後來簽六合彩，一切攏烏有，開始走偏路。

彼一時陣，轉回新營攏是找朋友飲酒唱歌，罕得回去。我被抓，阮爸爸打電話去警察局，說把我關到死。監所10年來，怹攏未曾來看，看同學攏有爸爸媽媽來看，怹帶一些家常菜分我食，就會想起厝內人，會想起佇厝大家作伙吃飯的時陣。認真講起來，以前攏做錯了，卡早當歹子，厝內透過小弟拿所費給我，一擺1千、2千，拿到就跟朋友飲酒唱歌，袂曉想厝內人乎我這條錢是乎我過生活，也袂曉想那是爸爸辛苦賺來的。

父母放捨我，我佇新營街頭，漫無目標行來行去。關久了，害怕接觸人，譬如要去便利商店買水，看到門口有2、3個人佇遐講話，我就不敢進去，會心慌，想說我買物件你們是按怎抵遐講話。錢快花完了，睡人家的亭仔跤，人報警來趕，3、4天換一個所在。後來行入一間農藥行，開200箍買農藥，欲自我了斷，但是目睭金金半點鐘，欲開不敢開，完全沒勇氣。

後來打電話給監護人，伊安排我去桃園安置街友的人安基金會。頭先不習慣，不敢佮別人講話，後來厝邊頭尾會來打招呼，問我是按怎會來這邊？才知影怹係真正關心。我佇廚房鬥跤手，煮食乎遊民呷，本來是幫手，後來換別人做我幫手。我佇遮等於贖罪，一方面煮食乎街友呷，比乎消費者快樂。另一方面，不用想明仔載會不會被抓，每日8、9點就睡了，一暝到天光。卡早的生活戴羅雷（ROLEX）開米淋（BMW），今嘛領殘障輔助一個月3千，但是卡早跟今嘛相比，我甘願今嘛。

我每日過得真平靜，但想起厝內人心會酸，不過大家攏有安穩欸生活，我也不方便去叨擾，一切攏係我應該。佇監所我畫POP做工廠布置，幫同學畫卡片乎家人佮女朋友，我每一日攏佇心內想欲畫卡片乎厝內人，講爸爸媽媽今嘛雖然不方便見面，但我會變好，請恁保重，等到彼一天，乎我有機會孝順恁。